داستان پنجم

داستان پنجم

دوُخا قوجا اوغلو دلی دومرول بویو
دئییلنه گؤره، خانیم، اوغلوزلارین آراسیندا دوُخا قوجا اوغلو دلی دومرول دئییلن بیر ایگید واردی. قوُرو بیر چایین اوزرینده بیر کؤرپو سالدیرمیشدی. کؤرپودن کئچندن اوتوز اوچ آخچا، کئچمک ایسته مگیندن قیرخ آخچا آلیردی. بونو نییه بئله ائدیردی؟اونا گؤره کی، "مندن جسور، مندن گوجلو بیر ایگید وارمی کی ، چیخیب منیمله ساواشسین؟ -دئییردی؛ منیم جسورلوغومون پهلوانلیق و ایگیدلیگیمین شهرتی روما، شاما گئدیب چاتمیشدیر"، -دئییردی.
بیر گون کؤرپونون یانیندا اوبانین بیر بؤلوک جاماعاتی چادیر قورموشدو. همین اوبادا بیر گؤزل ایگید خسته لنمیشدی. آللاهین امری ایله او ایگید اؤلدو. کیمی "اوغول" –دئیه، کیمی "قارداش –دئیه آغلادی. او ایگیدین اوستونده برک قارا شیون قوپدو. گؤزله نیلمه دن دلی دومرول چاپاراق یئتیشدی، دئدی: "آی اَبلَه لر، نه آغلاییرسیز؟ منیم کؤرپومون یانیندا بو های –کوی ندیر، نییه شیون سالمیسیز؟"."خان ، بیر یاخشی ایگیدیمیز اؤلدو، اونا آغلاییریق"، -دئدیلر. دلی دومرول دئییر: "آیا، ایگیدینیزی کیمی اؤلدوردو؟". دئدیلر: "واللاه، ایگید بَی آللاه –تعالی دان بویووق اولدو. آل قانادلی عزراییل او ایگیدین جانینی آلدی". دلی دومرول دئییر: "ائه، عزراییل دئدیگینیز نه کشی دی کی، آدامین جانینی آلیر؟ یا قادیر آللاه، بیرلیگین، وارلیغین خاطیرینه، عزراییلی منیم گؤزومه گؤستر، ووروشوم، گوله شیم، دؤیوشوم –یاخشی ایگیدلرین جانینی قورتاریم. بیر داها یاخشی ایگیدلرین جانینی آلماسین". دلی دومرول قاییتدی، ائوینه گلدی. آللاه – تعالی یا دومرولون سؤزو خوش گلمه دی.
"باخ بیر، دلی آخماق منیم بیرلیگیمی تانیمیر، کؤمگیمه کرمیمه شوکور ائلیمیر، منیم بؤیوک ساراییمدا گزیب مغرورلوق ائله ییر؟" –دئدی. عزراییلا امر ائتدی کی، ائی عزراییل گئت او دلی اَبلَهین ده گؤزونه گؤرون، بنیزینی سارالت، خیریلدادیب جانینی آل!
دلی دومرول قیرخ ایگیدله یئییب –ایچیب اوتورارکن بیردن عزراییل گلیب چیخدی. عزراییلی نه قاپیچی گؤردو، نه گؤزتچی. دلی دومرولون گؤزونده قارالدی. دلی دومرول چاغیریب سویلاییر، گؤرک، خانیم، نه سویلاییر، -دئییر:

وای، نه هِیبتلی قوجاسان؟
قاپیچیلار سنی گؤرمه دی.
گؤزتچیلر ده دوُیمادی.
گؤرن گؤزوم قارالدی،
توتان الیم یورولدو.
جانیما تیترَتمه دوشدو،
قیزیل قدح الیمدن یئره دوشدو.
آغزیم دوندو بوز کیمی،
سوموکریم اوووُلدو دوز کیمی،
آی ساققاللی آغ قوجا،
گؤزلری دومبا قوجا،
وای، نه قورخونج قوجاسان، دئ منه!
قادام –بالام توخونار بو گون سنه!
بئله دئینده عزراییلین آجیغی توتدو. دئییر:
اده، دلی اَبلَه!
گؤزومون دومبالیغینی نه بَیَنمیرسن؟
گؤیچک گؤزلو قیزلارین –گلینلرین، جانینی چوخ آلمیشام!
ساققالیمین آغلیغینی نه بَیَنمیرسن؟
آغساققال، قاراساققال ایگیدلرین جانینی چوخ آلمیشام!
ساققالیمین آغاردیغینین معناسی بودور!

آی دلی آخماق، اؤیونوب دئییردین "آل قانادلی عزراییل منیم الیمه دوشه یدی، اؤلدوره یدیم؛ یاخشی ایگیدین جانینی اونون الیندن قورتارایدیم". ایندی، آی دلی، گلمیشم کی ، سنین جانینی آلیم. وئریرسنمی، یوخسا منیمله دؤیوشورسن؟
دلی دومرول دئییر: "آیا، آل قانادلی عزراییل سن سنمی؟ "." بلی، منم!" –دئدی. "بو یاخشی ایگیدلرین جانیمی سنمی آلیرسان؟" –دئدی. "بلی ، من آلیرام" ، دئدی. دلی دومرول دئییر: "اده، قاپیچیلار، قاپینی اؤرتون! آی عزراییل، من سنی گئن یئرده آختاریردیم دار یئرده یاخشی الیمه کئچمیسن، دئیه سن؟ من ایندی سنی اؤلدوروم، یاخشی ایگیدلرین جانینی قورتاریم! "بؤیوک قیلینجینی سییردی الینه آلدی. هجوم ائتدی کی، عزراییلی وورسون. عزراییل بیر گؤیرچین اولوب، پنجره دن اوچدو – گئتدی.
ایگید دلی دومرول الینی الینه چالدی، قاه – قاه گولدو. دئدی:
"ایگیدلریم، عزراییلین گؤزونو ائله قورخوتدوم کی، گئن قاپینی قویدو، دار باجادان قاچدی. منیم الیمدن گؤیرچین کیمی بیر قوش اولوب اوچدو. ای های، من اونو قیزیل قوشا آلدیرمایینجا قویاراممی جانینی قورتارسین؟! "دوردو، آتینا میندی. شاهینی الینه آلیب، آردینجا دوشدو. بیر –ایکی گؤیرچین اؤلدوردو، دؤندو ائوینه گلرکن عزراییل اونون آتینین گؤزونه گؤروندو. آت اورکدو. دلی دومرولو گؤتوروب یئره ووردو. قارا باشی فیرلاندی، هوشسوز قالدی. عزراییل آغ کؤکسونون اوستونه قوندو. دلی دومرولا میریلدانیردی. سونرا اونو بوغماغا باشلادی.
دلی دومرول دئییر:

آی عزراییل، آمان!
تانرینین بیرلیگینه شبهه یوخ اینان!
من سنی بئله بیلمز ایدیم.
اوغرو کیمی جان آلدیغینی دویماز ایدیم
بیزیم بؤیوک ساحه لی داغلاریمیز اولور،
او داغلاریمیزدا باغلاریمیز اولور.
او اوزومو سیخیرلار، شرابی اولور.
او شراب دان ایچن سرخوش اولور.
سرخوشدوم، دویمادیم؛ دئدیگیمی بیلمه دیم.
بَی لیکدن اوسانمادیم، ایگیدلیکدن دویمادیم
جانیمی آلما، عزراییل، آمان وئر!

عزراییل دئییر: "آی دلی آخماق، منه نه یالواریرسان، آللاه –تعالی یا یالوار. منیم الیمده نه وار؟ من بویروق قولویام. "دلی دومرول دئییر: "بس جان وئرن، جان آلان دا آللاه دیرمی؟ "دئدی. عزراییلا دؤنوب دئدی: "بس سن نه ایش گؤرورسن؟ سن آرادان چیخ من آللاه –تعالی ایله خبرله شیم" دلی دومرول بورادا سویلامیش، گؤرک، خانیم، نه سویلامیشدیر:

اوجالاردان اوجاسان،
کیمسه بیلمز نئجه سن.
گؤزل تانری!
نئچه جاهیللر سنی
گؤیده آرار، یئرده ایستر.
سن مؤمن لر کؤنلونده سن.
سن بؤیوکسن، قدرتلی سن،
ابدی سیرر صاحیبی سن.
جانیمی آلسان، اؤزون آل.
قویما، عزراییل آلسین!

دلی دومرولون سؤزو بورادا آللاه –تعالی یا خوش گلدی. عزراییلی چاغیریب دئدی کی، بو دلی منیم بیرلیگیمی بیلدیگی، بیرلیگیمه شوکور ائتدیگی اوچون اونون جانی عوضینه جان تاپ؛ قوی دلی دومرولون جانی آزاد اولسون!
عزراییل دئییر: "آی دلی دومرول، آللاهین امری بئله اولدو کی، دلی دومرول اؤز جانی یئرینه جان تاپسین، اونون جانی آزاد اولسون!". دلی دومرول دئییر: "من جانی نئجه تاپیم؟ بیر قوجا آتام، بیر قاری آنام وار، گل گئدک، ایکسی سیندن بیری بلکه جانینی وئردی، آل منیم جانیم قالسین! ".
دلی دومرول دوروب آتاسینین یانینا گلدی. آتاسینین الینی اؤپوب سویلامیش، گؤرک، خانیم، نه سویلامیشدیر؛ دئدی:

آغ ساققاللی عزیز، حؤرمتلی، جانیم آتا!
بیلیرسنمی، نه اولدو؟
گوناه سؤز سؤیله دیم، -
آللاها خوش گلمه دی،
گؤیده آل قانادلی عزراییلا
امر ائله دی، اوچوب گلدی.
باسیب قونموش آغ کؤکسومه
شیرین جانی آلیر مندن.
آتا، سندن جان ایسترم، وئررسنمی

آتاسی دئییر:

اوغول، اوغول، آی اوغول!
جانیمین بیر پاراسی اوغول!
دوغولاندا دوققوز بوغرا اؤلدوردوگوم آسلان اوغول!
قیزیل تاغلی اوجا ائویمین دیرگی اوغول!
قازا بنزر قیز –گلینیمین چیچگی اوغول!
قارشی یاتان اوجا داغیم گرکسه،
سؤیله، اولسون عزراییلین یایلاغی!
سویوق –سویوق بولاقلاریم گرکسه،
اونلار اولسون عزراییلین بولاغی!
طؤوله –طؤوله شاه آتلاریم گرکسه، اونون مینیگی اولسون!
قاطار –قطار دَوه لریم گرکسه، اونون یوکلوگو اولسون!
یایلاقدا کی آغ قویونوم گرکسه،
مطبخلرده اولسون اونا شولن لیک!
قیزیل –گوموش پول گرکسه،
خرجله سین، قورسون بؤیوک بیر شنلیک!
دونیا شیرین، جان عزیزدیر،
جانیمی قییا بیلمیرم!
مندن عزیز، مندن یاخین
آنان واردیر گئت یانینا!

دلی دومرول، آتاسیندان اومیدی اوزولوب، آتینی سوردو، آناسینین یانینا گلدی. دئییر:

آنا، بیلیرسنمی نه لر اولدو؟
آل قانادلی عزراییل گؤی اوزوندن اوچوب گلدی.
منیم آغجا کؤکسومو باسیب قوندو،
خیریلدادیب جانیمی آلیر ایندی.
آتامدان جان ایسته دیم، آما وئرمه دی.
سندن جان ایسته ییرم، آنا جانینی منه وئررسنمی،
یوخسا "اوغول، دومرول!" –دئیه آغلارسان؟
آغ اوزونه ایتی دیرناق چالارسان؟
قارغی کیمی قارا ساچینی یولارسان، آنا

آناسی بوردا سویلامیش، گؤرک، خانیم، نه سویلامیشدیر آناسی دئدی:

اوغول، اوغول آی اوغول!
دققوز آی دار قارنیمدا گزدیردیگیم اوغول!
بَلَگینی بئشیکلرده بله دیگیم اوغول!
اون آی دئینده یئر اوزونه گتیردیگیم اوغول!
دویونجا آغ سودومو امیزدیردیگیم اوغول!
آغجا بورجلو حاصارلاردا توتولسایدین، اوغول!
اییرئنج دینلی کافیر الینده دوستاق اولسایدین، اوغول،
قیریل –گوموش گوجونه سنی قورتاراردیم، اوغول!
یامان یئره گئدیبسن؛ گئده بیلمرم،
دونیا شیرین، جان عزیزدیر،
جانیم قییا بیلمرم، یقین بیل! –دئدی.

آناسی دا جانینی وئرمه دی. بئله دئینده عزراییل دلی دومرولون جانینی آلماغا گلدی. دلی دومرول دئییر:
آی عزراییل آمان!
آللاهین بیرلیگینه یوخ شبهه، اینان
عزراییل دئییر: "آی دلی آخماق! داها نه آمان ایسته ییرسن؟ آغ ساققاللی آتانین یانینا گئتدین، جانینی وئرمه دی. آغ بیرچکلی آنانین یانینا گئتدین، جان وئرمه دی. داها کیم وئره جکدیر؟ دلی دومرول دئییر:
"حسرتلیم واردیر، اونونلا گؤروشوم". عزراییل دئییر: "آی دلی، حسرتلین کیمدیر؟ "دئییر: "یاد قیزی آروادیم وار، اوندان ایکی اوغلوم وار؛ امانتیم وار، اونلارا تاپشیریم، اوندان سونرا منیم جانیمی آلارسان" آتینی سوروب آروادینین یانینا گلدی. دئدی:

بیلیرسنمی نه لر اولدو؟
آل قانادلی عزراییل گؤی اوزوندن اوچوب گلدی.
منیم آغجا کؤکسومو باسیب قوندو.
منیم شیرین جانیمی آلیر ایندی.
آتاما دئدیم، جانینی وئرمه دی،
آناما دئدیم، جانینی وئرمه دی،
"دونیا شیرین، جان شیرین!" –دئدیلر.
ایندی اوجا –اوجا داغلاریم یایلاغین اولسون!
سویوق – سویوق سولاریم بولاغین اولسون!
طؤوله –طؤوله شاهانه آتلاریم سنین مینیگین اولسون!
قیزیل طاغلی اوجا ائویم سنین کؤلگه لیگین اولسون!
قاطار –قاطار دَوه لریم سنین یوکلو گون اولسون!
یایلاقداکی آغ قویونوم سنین شولن لیگین اولسون!
گؤزون کیمی توتورسا،
کؤنلون کیمی سئویرسه اونا اره گئت!
ایکی اوغلانجیغی یئتیم قویما!

آرواد بورادا سویلامیشدیر، گؤرک، خانیم، نه سویلامیشدیر –دئمیشدیر

نه دئییرسن، نه اؤتورسن،
گؤز آچاراق گؤردوگوم!
کؤنول وئریب سئودیگیم!
قوچ ایگیدیم، شاه ایگیدیم،
شیرین داماغ وئریب اؤپوشدوگوم،
بیر یاسدیقدا باش قویدوغوم
قارشی یاتان اوجا داغلاری
سندن سونرا من نئیلرم؟
یایلایارسام، گؤروم اولسون!
سویوق –سویوق سولارینی من ایچرسم، منیم قانیم اولسون!
قیزیلینی –گوموشون خرجله سم، کفن لیگیم اولسون!
طؤوله –طؤوله آتلارینی من مینسم، منیم تابوتوم اولسون!
سندن سونرا بیر ایگیدی سئویب سئچسم،
اره گئتسم، بیرگه یاتسام،
بیر اژداها ایلان اولوب، منی چالسین!
او مخنّث، اعتبارسیز آتان –آنان
جان ندیر کی، سنه قییا بیلمه میشلر؟
یئرلر شاهید اولسون، گؤی شاهید اولسون،
قدرتلی آللاه شاهید اولسون، قوربانام سنه،
منیم جانیم قوربان اولسون سنین جانینا!

عزراییل راضی لاشدی، قادینین جانینی آلماغا گلدی. ایگید دومرول عؤمور یولداشینا قییا بیلمه دی. بورادا آللاها یالوارمیش، گؤرک، نئجه یالوارمیشدیر، دئییر:

اوجالاردان اوجاسان،
کیمسه بیلمز نئجه سن!
گؤزل تانری، چوخ جاهیللر
سنی گؤیده آرار، یئرده آرزولار.
سن مؤمن لرین کؤنلوندسن.
سن ابدی حؤکمران سان.
بؤیوک یوللار اوزرینده
عمارتلر یاپیم –قوروم سنینچین.
هاردا گؤرسم، آج دویوروم سنینچین.
چیلپاق گؤرسم، دون گئیدیریم سنینچین.
آلیرسانسا، ایکیمیزین جانینی بیرگه آل!
ساغ قویورسان، ایکیمزه ده رحم ائت!
کرمی چوخ، قادیر آللاه!

دلی دومرولون سؤزو آللاها خوش گلدی. عزرلاییلا امر ائتدی: "دلی دومرولون آتا –آناسینین جانینی آل! دلی دومرولا و آروادینا یوز قیرخ ایل عؤمور وئردیم"، - دئدی عزراییل دا درحال اونون آتاسینین –آناسینین جانینی آلدی. دلی دومرول عؤمور یولداشی ایله یوز قیرخ ایل ده یاشادی.
دده قورقود گلیب بوی بویلادی، سوی سویلادی. "بو داستانی دلی دومرولون اولسون. مندن سونرا ایگید اوزانلار سؤیله سینلر! آلنی آچیق، الی آچیق ایگید شخصلر دینله سینلر!" –دئدی.

خئییر-دوعا وئرک، خانیم:
کؤکلو اوجا داغلارین ییخیلماسین!
کؤلگه لی ایری آغاجین کسیلمه سین!
جوشغون آخان گؤزل سویون قوروماسین!
آللاه سنی نامرده محتاج ائتمه سین!
آغ اوزون قارشیسیندا بئش کلمه دوعا قیلدیق قبول، اولونسون!
ییغیشدیریب ساخلاسین گوناهمیزی،
گؤزل آدلی محمّد(ص)ه باغیشلاسین، خانیم هئی!!!

+ نوشته شده در دوشنبه ۲۹ مرداد ۱۳۹۷ساعت 10:44 توسط فرامرز عبداله پور |